一到年尾，又到打工仔最開心嘅時候，除咗多公眾假期外，大家最關心嘅梗係加人工同埋出花紅啦！率先報喜嘅係港交所（00388），聽聞今年員工平均加薪幅度略跑贏通脹，尋日港交所亦宣布撥出1.213億元作為僱員股份獎勵計劃，其中720萬元會購買股份獎授行政總裁李小加作為長期獎勵，董事會亦批准撥出1.141億元購買股份獎勵其他入選僱員。
總撥款1.213億元中嘅9,130萬元已喺尋日獎授，即從市場購買股份獎授包括李小加等嘅僱員合共117人。按港交所昨收市價每股183.2元計，購入嘅完整手數股份最多約49.83萬股，佔港交所已發行股本0.05%。
較特別嘅係，今次股份獎授計劃除咗照顧現有員工外，亦預留咗3,000萬元畀明年新招聘嘅職員。港交所依家有好多新項目發展，其中由李小加「愛將」羅力出掌嘅市場發展科，應該有最多生力軍。
港交所自○五年後未有授認股權，改為股份獎授計劃，○六及○七年有授予股份，○八年因金融海嘯未有授股，去年底由於行政總裁換人，故遲至今年五月先公布授股計劃，所以尋日公布嘅授股計劃係反映今年表現。
余絲韻