每逢年尾都係嫁娶嘅旺季兼好日子，金融圈近期亦係喜事多籮籮，多位金融界猛人嘅屋企都有喜事辦，好似港交所（00388）前行政總裁周文耀會喺嚟緊嘅元旦日娶新抱，而金銀業貿易場永遠名譽會長馮志堅早前就剛啱嫁女，真係恭喜晒！
絲絲收到風，周文耀將會喺明年一月一日娶新抱，聽聞唔少金融界人士已獲邀出席婚宴，由於當日係公眾假期，且係元旦日，周文耀一早就叫定朋友預留空檔，飲佢呢餐喜酒，可想而知佢幾咁高興。
其實呢排周文耀都有好多開心嘢，佢早前獲頒金紫荊星章，依家又娶新抱，真係喜事齊齊來。佢今年初喺港交所退休，依家係數碼港主席，又係中國銀行（03988）獨立非執行董事，另亦有唔少公職，例如協助母校香港大學等，退休生活可謂非常忙碌及精彩，早幾日佢至返去香港大學專業進修學院，與超過100名校友分享佢嘅工作體驗以及對人生嘅反思。
至於馮志堅，佢係金銀業界嘅老前輩，早前金銀業貿易場嘅一百周年紀念酒會，佢亦有出席，絲絲當時見佢神采飛揚，唔講唔知，原來佢早前嫁女，難怪心情咁靚啦！
金融圈喜事接踵而來，睇嚟好多金融界人士應該都收咗唔少「粉紅色炸彈」喎！
余絲韻