市場熱線：馬鋼發力非同小可

講落真係幾奇，美股一路創雷曼爆煲後新高，但並非破位後速爆上；A股前日大升之後，尋日亦係牛牛皮皮；債券價格係咁跌，美匯指數跌穿79，港匯亦反彈，各樣條件都可以支持股市上升，但反而散戶愈來愈唔敢入市。

物聯網受惠股多

古勝尋日話管制物價扭曲需求，祖國傳媒報道話部分食用油停產，同○八年成品油荒一樣，煉一桶蝕一桶，你話邊個想做蝕本生意？○八年嘅成品油，變咗今日嘅食用油。雖然發改委即刻否認呢單新聞，但所謂空穴來風事必有因，管制物價終非長遠之計，加息始終係最好嘅方法，就算話會有熱錢流入同埋加重企業借錢成本嘅不利因素，但兩害取其輕都要勉為其難。

股票佬成日講「十二五」規劃同戰略新興產業，查實中央今日講東，聽日講西，每個行業輪流振興，總之人人有份、個個like。未來一期會輪到物聯網「十二五」規劃會喺元旦前後出台。好多人連物聯網個名都未聽過，中央又將物聯網分做10大領域，包括智能電網、智能交通、智能物流、智能家居……搵受惠股又係有排揀。不過，物聯網係未來科技，祖國要「大國崛起」會爭取先機，而買概念股不如買基建設備股，其中物聯網主要係用無線射頻識別（RFID）技術，各位可以尋吓寶。

港股尋日主要升水泥、鋼鐵同煤炭股，但國際銅價創新高又唔見帶動江銅（00358）。水泥同鋼鐵嚴格來講都唔算係資源股，鋼鐵原材料係鐵礦石，煉鋼過程又要用大量焦煤，所以睇鋼價之外，亦要睇原材料成本。鐵礦石價格預告出年首季會加價7%，加幅算係溫和，相信鋼企可以接受到。而中央已經唔畀電煤加價，雖然暫時冇限制焦煤加幅，但焦煤價格近排相當平穩。

鋼材需求有保證

鋼企最緊要係能否將成本轉嫁，屬於龍頭嘅寶鋼宣布由下月開始將每噸鋼價加150至300人仔，幅度為2%至5.5%，相信其他鋼企都會照跟，所以尋日鞍鋼（00347）、馬鋼（00323）同首國（00697）都升超過3%。祖國話要刺激內需，建築、造船、汽車、電器全部都要用到大量鋼材，所以需求肯定唔成問題。

馬鋼其中一樣產品係火車轆，祖國有9成火車轆都係馬鋼生產，上個禮拜孖屐大炒鐵路概念股，其實炒漏咗馬鋼。另外，佢阿媽馬鋼集團近日喺網站公布，出年目標銷售收入750億人仔，屬於樂觀預測。而馬鋼今年估計賺約15億人仔，預測PE約14倍，佢股價跌到4蚊有支持，有機會反彈到4.8元左右。

古勝