如果一○年係家電下鄉，咁一一年應該係環保節能，LED照明股就係好例子。成個LED板塊全線上揚，全因早前國家發改委、住房城鄉建設部同交通運輸部3個部委聯合組織嘅LED照明產品應用示範工程，正式公布入圍嘅28間企業名單，令到相關股份受消息刺激而上升，行業前景都幾理想。
雖然LED行業增長係大趨勢，但買港股仲係需要內地嘅配合。內地公布嘅「十二五」規劃就正好釋除咗呢方面嘅疑慮，規劃裏面嘅七大戰略性新興產業，節能環保排首位，反映中央嘅重視程度。
此外，節能照明都可受惠於「十二五」嘅減稅優惠，「三免三減半」令相關企業可免交頭3年嘅企業所得稅，而後3年嘅稅項就減半徵收，可以見到LED行業發展喺未來5年將會出現一個較快嘅高速增長期，同全球大趨勢呼應。
現時香港上市嘅企業中，照明股只有3間，直接受惠近期LED照明產品應用示範工程嘅公司，更只有達進精電（00515）同雷士（02222），但達進掌握多項技術，係內地節能路燈市場領導者；雷士就係內地最大節能品牌供應商，不過，LED產品只佔其毛利1.34%左右，唔算主要發展項目。
達進簡直係政策靈光下嘅大贏家，股價喺3.2元有支持，尋日仲大陽燭加大成交爆上，平均線仲整個「鳳翼天翔」，睇佢又似跌唔落，先睇目標價4.6元，小注追蹤！
香港大學電子金融服務榮譽助理教授 徐燦傑（作者為註冊持牌人士）