絲絲講場：周小川坦言 慘過伯南克
你話「人民銀行行長周小川做嘅嘢難啲？定係美國聯儲局主席伯南克嘅難啲呢？」呢條出自中央電視台，同周小川做訪問所提出嘅問題，唔知你會點揀。但周小川就好確定咁話，「自己做嘅嘢難啲」嘞。
因了解自己情況多啲
絲絲都唔知點比較好嘞，事關美國嘅貨幣政策係高透明度，而內地嘅貨幣政策就係大家知啲又唔知啲，直接比較真係唔容易喎。而周小川喺回應問題時就話，「大家都係了解自己嘅情況多啲，所以實話自己做嘅嘢難啲。」佢咁答都可以理解嘅，因為好多嘢係主觀嘅，絲絲都覺得自己啲工作好難。
雙雙入選思想家十大
早排美國《外交政策》雜誌揀咗二○一○年度100名思想者，話佢哋嘅思想塑造咗嗰年嘅世界。伯南克力壓美國總統奧巴馬高踞榜首，周小川就排第9位。呢個排名大家唔係好熟悉，認可度仲有待驗證，但美國將周小川擺入十大，證明佢哋非常關注中國嘅金融同貨幣政策，而且仲好欣賞周小川添。
余絲韻