絲絲講場：洪丕正聖誕出埠滑雪
臨近聖誕又係賓卡出門享受深冬嘅日子，今年銀行公會主席兼渣打香港行政總裁洪丕正（Ben）為業界勞心勞力，淨係為人民幣業務開嘅會都數唔晒，年尾當然要抖吓氣，聽講佢今個月20日就會飛去一啲滑雪勝地陪屋企人。
最大機會去北海道
但係Ben仲未諗實去邊，最大機會係去日本北海道，因無時差，可以玩盡啲，啲嘢又好食。如果有多啲時間，會去歐洲或者北美洲，甚至加拿大嘅威士拿，共通點就係全部都係滑雪勝地。
不過Ben話去歐美滑雪，山上餐廳唔係漢堡包就係熱狗，唯一係有次喺法國山上餐廳，飲咗三盅由白、黃、紅洋葱煮成嘅湯，令人有驚喜，法國屬歐洲最講究飲食嘅國家真係名不虛傳。
Ben仲話幾忙都會盡量喺聖誕節、復活節同暑假陪屋企人去吓短途旅行，實行工作生活平衡。
余絲韻