港交所（00388）前CEO周文耀，喺證券界幾十年，好多人仲想聽佢對業界嘅意見，早前佢去咗港大專業進修學院講talk，形容做CEO就好像拆彈專家一樣，又引用蘇軾嘅詩句自勉。
佢話證券巿場好有趣，任何人都敢於擔任專家評論金融政策、股票走勢，「有啲窮一生研究某一類型股份，亦都有人以蒙着雙眼放飛鏢嘅方式評股價」。面對各式意見，佢一直以蘇軾詩句「論事易，作事難；作事易，成事難」自勉。即係話，作為開放型嘅金融巿場，交易所必須謹慎行事，改變必須符合證券巿場同埋交易所嘅運作哲學、原則，亦要尊重巿場，絕不能一蹴而就，皆因措施對銀行、證券行、經紀、投資者、上巿公司都有影響。
金融巿場千變萬化、產品複雜，佢話單靠CEO嘅力量，好難搞掂晒所有嘢，一定要有團隊精神，佢好謙咁話「年華早去，智慧遲來」，更笑言愈做就發現愈複雜，都係退休好了。佢就喺工作過程中領悟了六大成功關鍵：公平處事、虛懷若谷、專注務實、循序漸進、與時並進及共融合作。
仲有一樣好重要嘅，唔好因為做得成功就自己邀功、沖昏頭腦；相反，有大鑊嘢就梗係要處變不驚，如果自己都慌埋一份，下屬點算？況且立法會、證監會、董事局、股東、傳媒等問責，矛頭都係向住CEO，所以必須更冷靜咁拆彈。
余絲韻