有「歐洲股神」之稱嘅富達投資總裁安東尼‧波頓（Anthony Bolton）唔單只投資揀股叻，仲識作曲、鋼琴演奏兼且寫書，可謂瓣瓣掂，不過，佢自爆話有死穴，就係語言天分唔高，索性唔學普通話。
佢話唔係謙至咁講，係有前科嘅。安東尼‧波頓就自爆「實例」，話自己喺14歲嘅時候學過西班牙語，又話呢種語言一向較易學，但係自己嘅成績都麻麻，當時個老師仲笑佢肯定係全班第一個「肥佬」的學生，就係呢個原因，搞到佢依家嚟到香港，都懶得學普通話。
不過，絲絲覺得唔係一定要學好普通話，先可以管理好中國股票基金，為咗貼近市場，安東尼‧波頓今年四月特登搬咗嚟香港，仲喺半山買咗層幾千呎嘅大宅住，實行近距離睇實中港股市。佢咁有誠意，投資者當然投佢信任一票。
絲絲有個主意，若果他朝佢改變初衷，希望學吓「煲冬瓜」，絲絲肯定第一個爭住免費教佢，大家一齊「波婆摩科」，當然也希望佢到時可以醒大家一兩招投資絕技啦。
余絲韻