市場熱線：中國聯通發動攻勢

北大人暫採拖字訣

中央已擺明非不得已都唔加息，雖然加息有加息嘅後遺症，但唔加息亦有唔加息嘅後果。冇錯！今個月CPI應該會回落，不過只係人為因素夾硬唔畀食品加價，嚴重扭曲咗孖屐嘅供需關係，受害嘅係中糧（00606）同雨潤（01068）呢類下游食品商，有消息話家樂福唔肯接受康師傅（00322）加價搞到斷貨。

依家通脹已係長期性問題，主要係祖國加人工，好難唔引發通脹。而食品漲價雖然有炒作因素，但亦係全球現象。

滬綜指報復性反彈81點，禮拜日開完嘅中央經濟工作會議，目標係又積極、又穩健、又審慎、又靈活，乜都佢講晒，同股評人叫人低揸高沽一樣：包中！阿爺依家猶豫不決，所以暫時採取拖字訣。政策愈狠風險就愈大，但好似香港政府出到狠招遏樓市炒風，依然都冇符。古勝上個禮拜叫人5.5元附近買美聯（01200），隻股尋日反彈上6.16元。

隻中國新材竟然臨門撻Q，華能新能源更因冇人吼而暫棄上市，但散戶對新股熱情愈低其實就愈易炒，因為可加速貨源歸邊，上周五上市嘅紛美包裝（00468）升一成。今日掛牌嘅MI（01555）業務夠冷門，幫中石油（00857）開發油田，鑽到油就分水，鑽唔到就你唔好彩，中石油手指罅漏畀你嘅都唔慌……

尋日A股固然大升，江銅、中海油服同天津創環A股都升停板，但H股只有天津創環（01065）跟足；另外聯通母公司亦升停板，聯通（00762）則升2.55%，主要係「大魔頭」龐大沽盤頂住。聯通上個禮拜四宣布將3G劈價，跟住隻股連升兩日，即係孖屐認同聯通呢招可以搶客。

劈價招數爭上客量

46蚊人仔可以用3G的確幾吸引，但呢個只係最低消費，博客戶愈用愈過癮，到時服務費自動升級。講開又講，依家香港人中咗「i瘋」毒，亦帶挈數碼通（00315）好好生意。聯通雖然亦有「i瘋」照住，但一直上客量都及唔上祖國移動（00941），今次劈價唔多唔少都會帶動上客量，高端客戶靠iPhone，低端客戶靠減價，到時「人財兩得」就最理想。

祖國移動做咗公用股唔上唔落，聯通反而可炒吓上落，隻股自從六月廿一日以來收市都未低過10蚊，尋日升穿埋50日同100日線，有轉弱為強迹象，如果上客量增長加快嘅話，孖屐自然會對呢隻股重估。

戰報

達進精電（00515）+20%

高仁上月二十六日指達進有力再創新高，昨日果然創年內高位，以推介當日低位計，累升20%。

經緯紡機（00350）+7%

帥哥本月三日建議買入經緯博突破，昨日高見4.18元，較推介當日低位3.9元累升逾7%。

古勝