孖妹缸湖遊：專家教你抗通脹

裴布雷喺基金界打滾了25年，曾任摩根士丹利投資管理部亞洲區主管及滙豐投資管理亞太區行政總裁等，現職日資基金公司，近期分別收購咗DBS Asset Management同Tyndall Investments。

裴：「亞太區基金教父」裴布雷

祺祺：我細個時好鍾意食某隻1蚊包嘅點心麵，十幾年後嘅今日賣成4蚊，物價真係漲得好快，你有冇同感？

　裴：我34年前喺美國史丹福大學讀書，學費連住宿雜費只需6,000美元，依家升到50,000美元，係嗰時嘅8倍有多！我唔想好似老人家咁緬懷過去，但呢啲的確係25至30年間發生嘅事。當你比較中國20年前同依家嘅物價，你會發現物價升幅真係難以置信！

人幣唔郁難控制熱錢

高妹：我前排去北京旅行，覺得嗰邊嘅生活指數已超越香港，但偏偏日本又面對通縮，啲政客組成「反通縮聯盟」，點解位處同一個地球會差咁遠？

　裴：國際性嘅通脹率仲好低，尤其係美國更可能陷入通縮，世界大部分地區都有重蹈日本覆轍嘅危機。當息口低至0%，在通縮的環境下，好多工廠都有閒置產能嘅情況，當經濟衰弱，物價又點會攀升呢？

祺祺：但另一邊廂美國大印銀紙，啲熱錢會流去邊㗎？

　裴：好多人都諗會唔會係中國。中國好關注房地產市場同通脹，因一旦泡沫爆破，經濟會陷入困境，相信當地官員可以吸取日本、台灣同美國樓市嘅經驗，有足夠經驗同學識處理，但人民幣匯率唔多郁，就更加難以控制熱錢流入。其他貨幣匯率浮動嘅國家好似泰國同馬來西亞，政府可以藉貨幣貶值解決部分問題，但中國同香港就要用其他方法。港元兌美元匯率完全唔郁，或者要改變就業情況平衡番，就好似部分就業人口會被解僱，之後再以較低人工被重新聘用。

物業遍布美港馬國

高妹：有啲人擺錢喺銀行以為係零風險，但無留意存款利息無法跑贏通脹，你自己嘅投資組合又係點？

　裴：每個人都要面對通脹，我自己係一個長線投資者，無諗過憑投資致富，目標只係抵抗或略為跑贏通脹。我大部分資金都投資喺基金，唔會短線炒股票，第一係因為基金經理受過專業訓練，比我更識得投資，第二係我買股票受守則限制。另外我有投資物業，好似我喺香港住嘅物業，仲有我喺加州同馬來西亞都有樓。

亞洲人投資不切實際

祺祺：有人話亞洲人冇咩長線投資概念，買入嘅產品又唔夠多元化，你點睇？

　裴：一般嚟講歐美及澳洲人投資組合較多元化。佢哋有約40%至60%資金買入債券，其他就會分散喺唔同地區嘅股票，好似歐美同亞洲，之後長線持有，當經濟增長嘅時候投資回報亦會增加，以抵抗通脹。

高妹：我呢排買親都係有內地概念嘅股份，有時仲會炒即日鮮添。

　裴：概括嚟講，亞洲人投資比較短線，好似韓國、台灣同香港嘅投資者希望短期內獲30%回報，咁係不切實際。亞洲人嘅投資組合就好似舉重嘅啞鈴，啞鈴左右兩邊最厚最重，中間由幼支撐住，組成嘅差別相當大，就好似亞洲人嘅投資組合咁，裏面買咗佢哋認為好穩健嘅銀行股，好似滙控（00005）；另外就係買投機產品好似對沖基金甚至迷債，投資風險頗大。成個組合只有穩健同高風險，但無長線多元化分散嘅投資概念。

後記 為學中文 21歲返小學

裴布雷唔單止有國際視野，仲好努力學習其他國家嘅文化同語言，佢啲中文一啲都唔比高妹差，普通話講得仲比祺祺靈光。因為佢21歲嗰年嘅夏天，特登遠赴台灣學中文，仲因為當時佢嘅中文能力只係得小學4年級程度，於是就同成班8歲嘅小朋友一齊上堂學中文，佢嘅好學精神，真係令孖妹好佩服。

親力親為赴台開荒

仲有，孖妹喺呢位「基金教父」身上見識咗咩係「路都係人行出嚟」嘅道理，精通普通話當然有助佢開拓華人市場，但要做出成績，背後需要付出更多努力。原來佢初到台灣開荒時，連埋司機在內，公司都只係得3個人，佢為開拓業務，同秘書由台北去到台中，走到城鎮同農村向民眾推廣基金，後來更成功將首批海外共同基金引入台灣，就好似樓下大健話齋，真係「各有前因莫羨人」。

裴布雷小檔案

履歷

‧摩根士丹利投資管理部亞洲區主管

‧滙豐投資管理亞太區行政總裁

‧怡富資產管理董事總經理及怡富基金主席

‧東方文華集團發展總監

婚姻狀況

‧娶得寶島美女為妻，育有一子一女

亞太區基金教父 裴布雷：每個人都要面對通脹，我係一個長線投資者，無諗過憑投資致富，目標只係抵抗或略為跑贏通脹而已。

民調半數認同樓市炒風收斂

政府推出額外印花稅、降低豪宅按揭成數等辣招不足一個月，多位官員指本港樓市炒風見收斂，炒家已退市。你認為是否已收效？據今期《東方日報》網上民調，截至上周末晚上6時嘅結果顯示，49.5%人認為已經奏效，其餘50.5%人則覺得仲未。

高妹、祺祺

若有料報畀高妹同祺祺或有嘢問，可電郵money.biz@opg.com.hk