市場熱線：保利協鑫大有錢途

阿爺做事一向估佢唔到，隨時失驚無神嚇你一跳，周末公布經濟數據熱到爆燈：出入口、房地產、CPI、PPI，忍住唔加息盞痛苦，尤其股民都希望佢早加早着、遲加瞓唔着，中港魚缸唔知牛皮到幾時？港股上周五成交已縮到唔夠700億元，買唔落手，沽又唔捨得。

航運板塊穩陣之選

恒指上周五微跌8點，但國指跌70點，上升股同下跌股之比例係312：690，再咁落去好易陰乾。估計今日本地地主股會有反彈，因為樓價同成交量已有反彈迹象，但內銀股因為加存款準備金率會有沽壓；而祖國出口同入口數據都創新高，航運股會係穩陣之選。

另一較強板塊係電器股，唔似得汽車股出年會冇咗購置稅優惠，起碼家電下鄉同以舊換新政策會延續，今年長揸海爾（01169）真係家山發，志高（00449）賣窩輪之後又1送9紅股，玩財技有一手。呢排送親紅股都例升，連新創建（00659）同信利（00732）呢類化石股亦唔例外，送紅股對基本因素冇任何影響，但除權到紅股到手之前有段乾貨期，志高變相1拆10更係不懷好意，到時街貨市值得番1/10，額頭鑿住個「炒」字，但隻股上周五由高位7.2元回落到6.37元收市，賺錢唔係咁容易。

呢排逆市表現最好之其中一隻股票非保利協鑫（03800）莫屬，原因係中央為金太陽示範工程提供50%補貼，另外爭取兩年後光伏發電規模唔少過1,000兆瓦，等於係舊年中國太陽能發電機裝機容量之七、八倍，內銷可以填補歐洲出口之放緩，所以光伏電池組件商搏命增產，需求多咗，多晶硅價格自然受惠，近期依然盤據在每公斤90美元左右之高位。

不斷擴產應付需求

協鑫亦宣布提前一個月實現3.5GW硅片產能達產目標，又宣布同晶澳太陽能控股簽訂長期硅材料產品供應合約，近期可謂喜事重重。

公司不斷擴產之下，生產成本亦降低到每公斤23.8美元，高盛估協鑫出年產銷量可增長1.49倍，一○至一二年每股盈利預測分別為0.2、0.29及0.4元人仔，以現價計出年市盈率只係8倍半。如果以10倍市盈率計目標價，應該可以去到3.36元。

戰報

國聯通信（08060）+15.6%

帥哥上周三推介國聯時，低位只有0.415元，周五股價一度高見0.48元，升幅達15.6%。

昆侖能源（00135）+11.4%

本月一日高仁指昆侖憧憬再獲注資，當日低位11.4元，周五最高升上12.7元，累計升幅11.4%。

古勝