每次絲絲出席敦沛金融（00812）嘅飯局，都會特別留意敦沛期貨行政總裁丁世民（Simon）嘅一言一語，皆因佢次次都話自己唔識講嘢，但就次次都語出驚人。大家都知早前聯儲局主席伯南克話，一旦通脹惡化，如有需要就會喺十五分鐘內加息。
對此，Simon有啲激氣咁話，以前我都幾崇拜伯南克，不過今次佢咁講嘢，好似某句廣告標語一樣，令「我有少少鍾意佢」變成「我有少少想舂佢」。
兔年就快到，唔少大行都睇好明年港股，不過Simon就話：「隻兔仔跳吓跳吓就令我諗起花木蘭，即係唔知佢公定乸，股市就唔知牛定熊，或者我係唯一一個對明年股市睇得最淡嘅分析員。」
尋日敦沛股價升咗兩成半，Simon就笑住咁講：「哈哈，等我散布吓謠言喇，其實係股神巴菲特準備入股呀。」唉，真係畀佢激暈。
余絲韻