臨近年尾好多賓卡都趕住放大假，跑夠數之餘仲係規定銀行要放足七日，趁機輕鬆下，渣打香港中小企業理財香港及華南總監區偉權（Kelvin）話原本計劃去拜訪吓澳洲啲酒莊，點知年尾要搬屋，留咗喺香港執嘢，不過渣打香港有個獎勵計劃，佢可以同一大班得獎同事出發去大阪玩番幾日。
Kelvin同絲絲講，渣打香港同保誠合作做保險業務，其中有個獎勵計劃，做得最好嗰廿幾個同事，會同十幾個管理層一齊去大阪玩番四日三夜，Kelvin當然有份啦，尋日正式出發。
雖然話年尾又放大假又去旅行，不過Kelvin話佢一年入面最搏殺嘅反而係十二月，因只要呢個月做好晒明年計劃，之後嗰年就事半功倍，睇嚟佢喺大阪返嚟後，可能未嚟得切回氣又要再搏過。
余絲韻