紛美（00468）尋日掛牌，見到股價升幅有一成四，梗係好開心。呢間公司專門搞紙盒包裝，最大客仔係蒙牛（02319）及伊利等，通常會喺客戶附近設廠，方便幫包裝，其中山東嘅廠房原來有段古，令CEO畢樺不停盛讚山東人係義氣仔女。
畢樺話，公司於○一年喺山東設廠，除交通方便外，仲發現山東人好有義氣。佢解釋，○五年公司曾出現經營困難，公司要先畀錢買原材料，再出糧畀工人，工人並冇怨言，仍留低開工，佢都好多謝呢班員工，山東廠房會繼續擴產，仲話好過喺深圳，因深圳人工貴。
畢樺仲話蒙牛要求好嚴格，並唔係紙品包裝咁簡單，因蒙牛要追溯奶源源頭，亦要保持牛奶新鮮，所有包裝盒上要有特別認證，加上蒙牛講求環保，要求佢哋計算工廠對環境嘅影響，佢哋用「碳足迹」計算，即係低碳排放而減少對環境影響。
余絲韻