證監會行政總裁韋奕禮突然宣布提前離任，市場議論紛紛，尋日絲絲見到財經事務及庫務局局長陳家強，當然唔會放過機會問個究竟。陳家強不願多談，只話證監會CEO個位會全球招聘，仲話證監會未來一定會保持良好的監管。
陳家強早前率領證監會同金管局等去英國做路演，韋奕禮亦有隨團。隨着韋奕禮即將離任，咁英國之行會唔會係韋奕禮最後一次同政府出國訪問呢？陳家強回應話韋奕禮明年中才離職，明年三月政府會再到美國做路演，推介本港金融市場，陳家強話未定訪問團嘅名單，但韋奕禮應該都會去。
其實韋奕禮今次宣布提早bye bye，中環人都唔係感到太意外，普遍認為佢明年約滿都不會續約。大家依家最關心係邊個會坐佢個位，各位自問對監管市場有認識，又熟悉中國國情，而且有政治技巧，不妨毛遂自薦！
余絲韻