踏入十二月，又係時候為過去一年的人、物、事作總結。據財經頻道CNBC公布的二○一○年贏家輸家榜，可謂輸家當道，由美國總統奧巴馬到英國石油（BP）前行政總裁海沃德，以至歐洲經濟及貨幣聯盟皆無一幸免，社交網站Facebook創辦人朱克伯格則成為少數贏家之一，果然年少有為。
今次係CNBC第二年搞贏家輸家榜，由讀者以投票決定成王敗寇。唔知係咪今年發生嘅政經大事多令人沮喪，受到美國失業率高企、斷供收樓潮不斷、債務和財赤嚴重，以及戰爭等因素影響，包括美國業主、納稅人及勞動階層都慘成輸家，可以講輸家無處不在。經濟差拖累奧巴馬民望，他雖帶領美國推行醫療及金融監管改革，但未能扳回一城，終以高達75%票數當選輸家。
美國經濟慘情，歐洲也不好過，自歐債危機爆發，暴露歐洲經濟及貨幣聯盟嘅缺點，順理成章淪為輸家。其他輸家仲有參議院銀行委員會主席多德、美國證交會主席夏皮羅等等，值得注意嘅係，喺貨幣戰嘅紛爭下，連匯率自由浮動嘅貨幣亦變輸家。
贏家方面，朱克伯格年紀輕輕已創造出風靡全球嘅社交網站，身家豐厚，即使被電影「唱衰」，贏家地位仍穩如泰山。反觀聯儲局主席伯南克推行備受爭議嘅第二輪量化寬鬆（QE2），其「功績」孰好孰壞令人難以抉擇，難怪贏家票及輸家票分別佔46%及39%，只以些微差距躋身贏家之列。其他贏家還有近年大行其道的交易所買賣基金（ETF）。
余絲韻