市場熱線：中通服 估值夠吸引

聯通（00762）3G減價反而升3.41%，做咗戰略新興產業嘅鐵路股繼續係上升火車頭，智能交通（01900）、南車（01766）、中鐵（00390）同中自化（00569）續有好表現，鐵路威就輪到飛機收皮，真係風水輪流轉。

昆侖能源爆發力強

車股有少少反彈，食品股亦普遍回升。兩隻風電股招緊股，但一眾風電上、下游股齊齊跌，唔使問都知招股反應係點。昆侖能源（00135）抖咗兩日又再發力，距離周一高位只差兩仙，但已係收市新高；老古推介時都話呢類橫行愈耐嘅股，爆發力亦會愈強。

菲律賓外判產業超越印度做咗「一哥」，邊隻股最有概念呢？就係揸住菲律賓長途電話公司嘅第一太平（00142），但隻股走勢好悶，相信要等到派成績表至有得發威，淨計亞洲貨幣升值已進帳唔少，加埋佢嘅菲律賓基建同礦產有收成，可以作為備忘。

下個禮拜三上市嘅世達科技（01282），雖然係捲土重來，但其實除咗手提電腦touch screen概念之外，佢嘅指紋人臉識別系統都係一門有錢途嘅生意，連廣州保障房亦都配置該系統，驚住畀人轉租圖利，相信未來用途會愈來愈廣泛。

中國木業股價插水

細價股輪流上演高台跳水，其士泛亞（00508）技驚四座，德普（03823）7個交易日插4成幾，花名「超人電池」嘅中聚雷天（00729）跌穿今年初復牌後低位，中國木業（00269）尋日一跌就26.3%，莊家嘅「貨底」平過你好多，一插落嚟就如無底深潭。

老古喺上個月22日曾經推介過中通服（00552），當日收市價啱啱同尋日一樣，都係4.9元，但國企指數同期就跌咗3.33%，而且目前大市氣氛更係較當時差好遠，所以算係跑贏大市；當然，呢類穩陣股抗跌能力的確較強，但佢嘅走勢更加似醞釀突破，如果衝破5蚊就海闊天空。

中通服出年預測PE得11倍幾，每年盈利都有十幾巴仙增長，PEG低過1，加埋出年息率會升到4厘樓上，短線望佢破位後再升一成，長線則穩穩陣陣收息亦唔曳。

其實內地電訊業未來幾年開支有增無減，包括3G、4G、寬頻升級、日後保養等。中通服全國論規模同技術都冇其他公司及得上，兼有3大電訊商做股東。呢排個市要睇守唔守得住頭肩頂條頸線，冇乜好買，都係諗番中通服，攻守皆宜。

戰報

中國智能交通（01900）+21.4%

高仁尋日推介的中國智能交通，股價創5.15元新高，以低位4.24元計，單日升幅達21.4%。

北京御生堂（01141）+10%

桃桃昨日指御生堂強勢可持續，昨日果然以全日高位0.41元收市，較低位0.37元升逾一成。

古勝