市場熱線：雷士照明發光發亮

「揸直升機掟銀紙」呢招有冇效，可能要等三幾年至能夠蓋棺定論，但對魚缸起碼有短線支持。花旗公布失業率去到9.8%嚇親人，但美股咁都唔散，主要靠美金變弱，道指收市再升近20點，報11,382點，同上次高位只係差70點，今個禮拜破頂在望，只要美匯唔再穿上80，經濟數據亦好少理。

內地收水拖累港股

全球股市上周三已有完成調整的迹象，但港股上個禮拜五竟然倒跌128點，認真令人失望，連港匯都跌番到7.76，唯一可「賴」嘅係祖國開中央政治局會議，將貨幣政策由「適度寬鬆」轉為「穩健」。祖國係玩呢類文字遊戲嘅專家，字眼轉變即係「收水」，呢樣唔使講都知，淨係睇小排量汽車購置稅優惠取消嘅政策，已係領導人唔想經濟過熱嘅例證。

ADR回升百幾點，恒指今日重上23,500點先正常，如果又試高開低收，咁就有重估形勢嘅必要。上周五上升嘅股份主要係太陽能股、燃氣股同個別紡織股，古勝剛啱推介嘅哈動（01133）亦升逾一成；零售股則有回吐，今日汽車股可能會有壓力，但煤炭股跌咗兩日後應有機會回穩。

雖然中央話叫停燃氣加價，但燃氣股反而表現唔錯，查實民用燃氣所佔佢哋業務比重唔大，昆侖（00135）連升8日最神勇，新奧（02688）亦升6.62%，就算派完成績表後被質低嘅中國燃氣（00384），都反彈2.65%，其實佢嘅成績表唔係咁曳，主要係衍生工具同液化石油氣業務輸錢。

新股通常都係短炒，隻股有冇料到一、兩個月就現形，雷士照明（02222）升足半年可謂異數，上個禮拜再創新高，仍未有回落迹象。間公司業務好簡單：做燈膽、燈具，又唔係乜嘢高科技產品，但祖國咁大個內需市場，加埋「十二五」規劃環保能源概念，淨計呢兩樣都夠殺。

慳電膽生意有可為

老實講，LED燈用於家居照明太貴同唔夠光，有排都仲未成為主流，但白熾燈漸被淘汰，慳電膽呢幾年大為普及，好多省市都提供優惠畀市民買慳電膽。不過，LED燈亦不可不做，雷士5年前開始做LED技術開發，最近並中標國家首批LED示範工程，LED燈主要係做路燈同戶外裝飾燈，政府未來幾年批合約應該唔嘢小。

雷士管理層早排亦話，出年海外定單增加一半，雖然計落佢PE二十幾倍都唔平，但勝在四平八穩，搵唔到乜嘢瑕疵，訂止賺位持有可也。

戰報

哈爾濱動力（01133）+21.9%

古勝上周三推介哈動，周五創13.9元一年新高，以推介當日低位11.4元計，累積升幅21.9%。

興業太陽能（00750）+17.4%

桃桃上周二指興業太陽能蓄勢破關，當日低位4.92元，周五高見5.78元，累積升幅17.4%。

古勝