愈近年尾，市場都開始有少少靜，不過，個別股份繼續舞動，好似零售股就係一個好例子，一樣精彩。上星期，有幸出席陸東嘅投資慈善晚宴活動，順道一聽高人指點。正所謂「先求知，再投資」，大學教授都要不斷增值，唔係會畀人話「冇料到」，我哋經常稱之為「與時並進」。
陸東講完之後，各大傳媒例必以「頭版相贈」，甚麼33,000點，估值合理，大好友喺份份報紙都見到。當然喺筆者嘅解讀下，陸東嘅分析係有根據，加上佢老哥學院得嚟又唔高深，以「大環境，大形勢」配合數據做分析，講唔到大話，確係有料到。當中佢最愛嘅內銀股──建行（00939），筆者早前都有提過，確實以依家中國銀行體系嘅安全度嚟睇，估值確係吸引。如果你真係好懶，買建行或者安碩A50（02823）啦，起碼大家都為咗對抗通脹去做番少少嘢。
另外，陸生睇好嘅港交所（00388）都要留意，單一大賭場，澳門就有知六個賭牌，加上筆者之前講過嘅港交所二○一一策略，一定要留意。至於佢做咗非執董嘅TCL通訊（02618），佢話出席呢間公司呢個位係因為公司有品牌、有技術、有銷售點，應該有睇頭！
以當前恒指走勢而言，24,195點係依家嘅阻力位，破到呢個位又可以向下年嘅高位進發。正如筆者所講，22,850點唔破，大方向仍然向上，繼續追蹤！
香港大學電子金融服務榮譽助理教授 徐燦傑