外圍持續不明朗，但係尋日港股有反彈，惟成交持續縮水，資金流向繼續成為隱憂，但炒友一於少理，近期當旺嘅時裝股仍然有炒作，JOYCE（00647）勁升逾五成。不過，詩詩覺得時裝股炒咗咁耐，資金係時候換換場，醫藥股似係下一個目標。新股金活（01110）昨勁升15%創新高，而上咗市成個月嘅四環醫藥（00460），應該係時候爆發。
招股時係威係勢嘅四環，掛牌後最高只見過6.1元。近日逐步回升，尋日衝穿6元關升勢加速，衝上6.17元新高收市。四環以研發心血管藥為主，去年於內地心腦血管藥物市場佔有率高達17.1%，過去幾年盈利持續增長，○八、○九年及今年上半年盈利增幅分別達32.2%、37.7%及110%，而整體產品毛利率達70%以上。
四環上市後於低位反覆近一個月，抽番嚟沽嘅應已沽得八八九九，貨源重新歸邊，爆發力唔講得笑，起碼可一試7元關，穿5.7元止蝕。
詩詩