絲絲講場：新董事秘書功力厚 胡浩堪稱「老工行」
工行（01398）新任董事會秘書胡浩首次來港見傳媒，絲絲聽佢細數當年，原來佢由八三年已投身工行，絕對稱得上係一個「老工行」，仲話自己之前做過國際業務部總經理，個人比較外向，所以一啲都唔驚傳媒。
原來胡總以前做過好多職位，連與水利工程有關嘅都做過，其後調返北京，工行新聞處處長謝泰峰都話胡總當年已經係「南水北調」。另外，工行喺金融海嘯時盈利逆市上升，而胡總當年曾調任做風險管理，真係與工行經歷過唔少風浪。
中銀監考核 有信心Pass
胡總做董秘唔係話做就做，過程牽涉幾個監管部門嘅審批，例如中證監已批咗佢上任，依家仲等緊中銀監正式審批，佢好有信心咁話已經收到風，自己喺中銀監個考試考得唔錯，好有信心過關。
難得佢來港與大家講吓工行集資，絲絲問佢有關《巴塞爾資本協定三》嘅影響，佢即刻話呢條問題都畀中銀監考過，佢好流利咁數晒新要求數據以及內銀、工行應對方法，睇嚟佢咁有信心話自己考試考得好，真係不無道理。
余絲韻