絲絲講場：滙豐保險軍官掌帥
滙豐保險有新官上任，梁偉邦（Robert Lang）將出任香港業務董事總經理，接替石湛森離任後嘅空缺，負責發展及擴張本港嘅保險及強積金業務。
大家可能會奇怪，點解石湛森離開咗幾個月後，Robert喺上周四先正式上任？原來Robert之前係HSBC Life（UK）嘅行政總裁，佢哋嘅人事調動要等當局審批。
絲絲知道Robert嘅第3個小朋友剛啱出世，佢之前正好趁上任前嘅空檔，留喺英國陪伴臨盆在即嘅妻子。相信依家Robert唔使再心掛掛，可以全心全意投入新工作。
曾當澳洲炮隊中尉
睇番Robert嘅履歷其實幾得意，佢除咗有多年保險業嘅經驗，仲曾經係皇家澳洲炮隊及情報軍團嘅軍官，官階更貴為中尉添。
唔知Robert嘅管理風格係咪好似軍人咁一絲不苟，着重團體精神呢？
余絲韻