投資者當然希望上市公司透明度高啲，香港會計師公會嘅「最佳企業管治資料披露大獎」五個組別當中，有兩個組別嘅鑽石獎就懸空咗，即係冇得獎者，莫非係啲公司退步咗？
會計師公會會長馮英偉解釋話，每年嘅評審準則都有提高以及加入一啲新規定，可以講依家要求愈嚟愈嚴格，要攞到最高水平嘅鑽石獎唔係咁易。佢仲話相對10年前，依家多咗公司主動披露高級管理層嘅薪酬，亦提供更多有關風險管理、內部監管、社企責任及環保報告等方面資料，但仍然有好大嘅進步空間，例如應該就董事局委員嘅表現作定期正規評核、增加如獨立非執董嘅提名及遴選透明度、早啲提交年報等。
講番今次選舉，喺超過220份上市公司及機構年報中，中電（00002）、渣打（02888）及神華（01088）分別獲得恒指成分股、非恒指成分股（大市值）及H股公司組別嘅鑽石獎，係咁多獎當中嘅最高榮譽，其中中電已係連續第8次攞到呢個殊榮，而中電信（00728）及國壽（02628）就係首次獲獎。
余絲韻