絲絲講場：會計師公會選戰搶上位
一年一度嘅會計師公會（CPA）理事會選舉將於十二月十七日舉行，現任兩名副會長周福安及蔡永忠如想「再上一層樓」，坐正做會長，就先要過成功連任理事呢一關。
副帥坐正須連任理事
話說今屆理事會選舉共有7名現任理事要卸任，包括周福安、蔡永忠、左龍佩蘭、岳思理、陳錦榮、鄒小磊及Paul Winkleman，但按例可以再選。會計師公會會長任期係一年，根據慣例，副會長好多時會升做會長，換言之現任會長馮英偉今年底退任後，新一屆會長熱門人選係周福安及蔡永忠，但佢哋要坐正，必須先要成功連任理事。
佢哋兩人都係會計師公會嘅「老朋友」，周福安自○四年一月起已加入理事會，依家係思捷環球（00330）執行董事暨財務長；蔡永忠就係會計師行合夥人，自○四年十二月起已加入理事會。
雖然今次會計師公會理事會選舉與歷屆分別唔大，但由於距離二○一二年立法會選舉唔係太遙遠，唔排除有唔少人已開始部署，為將來做準備。
今次究竟有幾多人會角逐呢7個席位，好快就揭曉，但情況應該都幾熱鬧，聽聞已有人想拉攏更多盟友參選，以圖增加喺理事會上嘅影響力，所以預料選情都會幾激烈。
余絲韻