市場熱線：山水水泥慢火煎魚

花旗「黑色星期五」銷售算唔錯，利豐（00494）仍係升得最勁藍籌，20日內跑贏大市約兩成。雖然美國人買嘢手緊，不過網上銷售卻好勁，香港人雖係唔習慣網上買嘢，但喺百物騰貴之下，愈來愈多人用「淘寶」購物，通脹會逐步改變人嘅消費習慣。

金活愈升愈有力

尋日升嘅係賣衫股同醫藥股，跌嘅係賣金股同賣車股，周生生（00116）喺內地被指金飾含金量不足，K金產品全國下架，18K金手鏈可辦理退貨，港商原本最值錢嘅係貨真價實保證，好彩佢嘅危機處理意識都算高，愈拖得耐就愈蝕底，大家樂（00341）就係教訓。

原來金活（01110）先係今年新股王，令人諗起舊年嘅新股王國藥（01099），而兩隻都係做醫藥分銷，但國藥今年就威風不再。藥股好蝦人買，隻藥係草抑或寶要專業人士至知，唔同其他消費品透明度好高。隻廣州藥業（00874）爭紅罐王老吉商標權隨即飆升，而紅罐王老吉亦牽涉到中糧包裝（00906）一半生意。

呢排好多調控物價嘅國策公布，總有部分係同閣下所揸嘅股票有關，所以要時刻留意新聞。祖國話必要時採取限價措施，結果水電燃氣被率先開刀，化肥亦話限制出口。

公用事業係最慘，「煤電聯動」係一個笑話，搞到電廠蝕大本；依家燃氣又唔准加價，年中時上游天然氣價格加咗25%，結果又係燃氣股硬食差價，但尋日燃氣股個別發展並唔算差。另外，乙烯等化工產品嘅原料進口燃料油減稅，唔怪得上海石化（00338）呢排咁勁。

同亞泥拍住搵食

古勝早排推介過山水水泥（00691），話間公司喺山東同遼寧做水泥業「一哥」，食正建材下鄉試點，另外又大舉投資新疆參與大開發，結果山水繼續沿住上升軌前進，個市咁飄搖仍然相當硬淨。謎底前排揭曉，原來係同台資嘅亞洲水泥（00743）合作，亞泥入股山水喺遼寧同內蒙合營公司嘅30%股權，另亞泥亦直接入股山水10%股權，點樣入股法可能要等最遲半年至完成協商，如果山水發新股嘅話，未來股價相信會有一定支持。

買水泥股始終最緊要睇水泥價格，近期先後有限電令、限制煤炭價格、建材下鄉等因素，祖國樓市調控咗咁耐，結果地王又相繼產生，加埋保障住房大興土木，睇嚟水泥需求同價格會保持強勢。

戰報

慕詩國際（00130）+13%

高仁上周四建議趁慕詩業績前炒一轉，昨日股價創3.48元新高，累計升幅達13.7%。

中國森林（00930）+10%

股博士上周三指中國森林升勢未破壞，股價昨日高見3.99元，較推介當日低位3.61元升10.5%。

古勝