人民幣計價產品蓄勢待發，港交所（00388）網站嘅日報表由明年四月四日起亦「大變身」，加多咗好多有關人民幣產品交易嘅資料。
繼本周四公布人民幣產品嘅印花稅及相關費用，會按每日指定時間嘅匯率計算後，港交所尋日又出咗通函畀經紀，通知佢哋由明年四月起，喺港交所網站發放嘅日報表會有唔少修訂，例如「是日成交」將包括港元同非港元嘅成交；以人民幣交易嘅股票總成交會喺新一行嘅「人民幣產品成交（CNY）」獨立分行顯示；喺「十大成交金額最多股票」及「十大成交股數最多股票」亦會加入個別股票嘅貨幣代號。
報價方面，會加入個別股票嘅貨幣代號；「整體市場總計」將以港元顯示，並包括非港元嘅成交。由同日起，主要結合一周日報表交易數據嘅周報表將停止發放。
絲絲聽聞發放畀報章做股市行情版嘅資訊亦將有一些修訂，至於港交所網站首頁一啲供參考嘅市場資料，未來亦可能有啲調整。
余絲韻