絲絲講場：成功老闆馬雲認衰唔認叻
好多人都希望自己做老闆，但究竟要有乜嘢Quali先做到？坊間有好多講法，但大家不妨參考一下阿里巴巴（01688）老闆馬雲嘅意見，睇吓啱唔啱用。
阿里成功同佢無關
內地傳媒最近登咗一篇馬雲嘅訪問，報道中佢提到阿里有今日嘅成功同佢無關係，唔係佢個人功勞，極其量佢都只係有10%嘅功勞，皆因佢冇寫過一行代碼，亦冇做成一個銷售客戶生意，全部都係同事做。咁都未止，佢仲話阿里做得唔啱，就一定係佢嘅錯，因為佢喺關鍵時刻冇堅持原則、理想。
即係話，做老闆要肯承擔、唔邀功至得。至於點樣先可以成為阿里員工，絲絲就無可奉告，但如果係女性，相信機會較大，因為馬雲講到明喺公司特別喜歡用女同事，又話公司出色嘅女人，都係不抱怨、平常心、外表好柔，但內心卻非常堅強，怪唔得絲絲發現阿里嘅管理團隊中，確實有唔少女性高層。
余絲韻