相信大家都好習慣西方對中國「東方巨龍」嘅美稱，又或者笑納佢哋對中國係「亞洲經濟火車頭」嘅形容，但講到形容中國經濟嘅現況，又點及得人民銀行貨幣政策委員會委員李稻葵話，「中國經濟似16歲嘅姚明，好似準備好，實際容易受傷」咁傳神呀！
近日李稻葵不停接受訪問，除咗同大家談論美國第二輪量化寬鬆措施，佢又講吓樓價，當講到依家嘅經濟情況時，佢就話中國係「被」金融危機嘞，換言之大陸都係受害嗰個。
何解？大家唔覺中國係畀全球金融危機爆發而突然間推咗上國際舞台前端咩？李稻葵話，「我哋確實未準備好，就好似16歲時嘅姚明。身高可能有一米九至兩米，表面上係好好嘅籃球員，實際上未準備好，身體好單薄，容易受傷；身體協調性唔得，肌肉唔夠發達，自我保護意識不足。呢個正係我哋依家嘅情況。」
講真吖，真係要讚吓推薦李稻葵做貨幣政策委員會專家成員嗰位仁兄，因為李稻葵嘅口才真係幾好。講到樓市，佢就一語中的，直指導致內地樓市成為「怪胎」嘅其中一個原因，係因為大家仲有封建嘅土地文化傳統，大家都想有樓，搞到樓價奇高，都係「奇怪嘅需求」所致。
余絲韻