南北韓兩兄弟開拖打仗，連個市都畀佢嚇一嚇，好彩，恒指喺22,850點係一個唔錯嘅基石，暫時都企得穩，都係嗰句「炒股唔炒市」。摩童大佬發表報告預期，未來10年中國經濟增速將放緩，但消費將加速開車，成為全國經濟增長引擎，未來10年中國經濟將迎接消費黃金時期，二○二○年中國消費總量將達到美國的三分之二，佔世界消費總量12%。
報告又指出，中國新增消費已經喺○八年超越美國，預計二○二○年將達世界新增消費嘅20%。講真，從宏觀經濟學分析，消費增長主要受惠於經濟增長、工資增長、服務行業嘅發展、公共支出、收入結構再分配、人口老齡化、經濟發展水平同城市化。內需肯定係未來中國嘅黃金十年，喺度搵股炒勝算自然高，一早講咗「大主題，大概念」，要跟勢走。
早前講過嘅四環醫藥（00460）同雷士照明（02222）終於有「動起來」嘅感覺，可以繼續跟蹤。呢兩隻股都因為各自有一個觸發點，例如收購業務或者定單增加從而擴張業務，所以價格真係好需要等待，唔好急。
喺牛二與牛三嘅迷糊狀態下，勤做功課，為迎接下一個浪做好準備，筆者鼓勵投資為財富增值嚟對抗通脹，最鼓勵粉絲以其月薪做每月回報指標（方便控制心理質素同自製花紅，靠加人工一定追唔到通脹），投機就自己諗！
香港大學電子金融服務榮譽助理教授 徐燦傑