易運錢：中國油氣跟炒冇有怕

大市第二日反彈，但係力度就唔多夠，成交更加係靜過鬼，不過落到場又唔覺氣氛太差，皆因唔少散戶愛股都有唔錯嘅表現。詩詩尋日揀中的大冶有色（00661），最多升超過7%，收市仍升5%，既然資源股仔有勢，梗係要食住上，睇埋隻中國油氣（00702）。

中油氣月初公布，在陝西省金莊油田勘探發現高產深層天然氣，預料未來天然氣產量將大幅上升。雖然有利好消息，但無奈市況唔就，股價亦由高位0.51元回調，但早兩日去到0.46元已唔肯落，尋日回升4.3%，收0.485元。

中油氣上個月尾以每股0.45元批咗4.32億股新股畀OZ Management，可以話係幫股價打咗底，與此同時又配售2.5億份認購證畀至少6個承配人，權證行使價為0.53元。兩個動作，可以話畀晒Guideline，短線喺0.45至0.53元之間，真係唔怕游番幾轉，睇長少少，以股證行使價加兩成左右，見0.65元亦唔出奇。