大凌集團（00211）停牌已經6年幾，但有關呢間公司嘅新聞一直都冇停過，例如監管機構對公司前職員採取法律行動，又有小股東控告監管機構涉嫌違反職責，總之沒完沒了。尋日又多一名大凌小股東聲稱已入稟高院，控告聯交所上市科總監（監察部）簡嘉穎疏忽及失職，導致原訟人嚴重損失，因而要求賠償1,400萬元！
呢位原訟人胡錦波尋日講解因何有呢次行動，佢話當年因為睇好大凌呢隻股票，由四毫幾子開始買入，買到得番幾個仙都有溝貨，保守估計投資咗二、三百萬，結果公司停咗牌，而公司近年已恢復盈利，仲派息、派紅股，但一直復牌無望，佢曾經與聯交所兼同簡小姐見面，但始終攞唔到一個滿意嘅答案，所以決定入稟高院，佢話係想畀交易所及簡小姐一個警醒喎。至於交易所就保持一貫作風，不作任何回應。
余絲韻