德國嘅汽車舉世聞名，近年當地三大車廠寶馬（BMW）、平治以及福士旗下嘅奧迪（Audi）就為咗稱霸全球豪華汽車市場爭個不休，絲絲最近喺《彭博商業周刊》（Bloomberg BusinessWeek）就睇到篇有趣報道，話呢三間車廠將佢哋嘅戰場擴展到兒童玩具，仲話嚟緊嘅聖誕節係兵家必爭之地喎。
其實早喺今年二月，奧迪就推出咗一款價值9,700歐元（約10.37萬港元）嘅限量版Auto Union Type C嘅豪華兒童腳踏玩具車，而且銷情唔錯，500部貨依家只剩番100部，之前更推出咗一系列以泰迪熊為主題嘅玩具。寶馬及平治都唔敢怠慢，紛紛趕喺聖誕前推出兒童雪橇、學行車及腳踏車迎戰。
呢三間車廠點解突然搞埋玩具車？原來佢哋嘅目光好遠大，知道依家汽車市場差唔多飽和，於是索性出埋兒童玩具，等佢哋嘅顧客買嚟送畀仔女，小朋友自細熟悉佢哋嘅品牌，大個咗就會再幫襯。
值得一提嘅係，自從英國豪華車廠Aston Martin喺八十年代尾推出咗一款價值24,000鎊、連英國查理斯王子都買嚟送畀兩個寶貝王子嘅兒童玩具車後，就手執豪華兒童玩具市場嘅牛耳，睇嚟呢三間德國車廠要加把勁急起直追喇。
余絲韻