絲絲講場：新Logo睇落得一點 中信1616玩「微刻」
中信1616（01883）九月時獲母公司中信集團注入內地虛擬專用網絡（IP-VPN）供應商「中企網」，公司尋日公布已改名為「中信國際電訊」，將喺本月底正式用新名稱買賣，同時集團仲將公司標誌同步轉用中信總公司嘅標記。
驟眼睇似日本國旗
絲絲尋日打開集團喺聯交所上載嘅公告，一打開即刻呆咗，因為一望落去，公司嘅新標誌就只係得一點紅色嘅小圓點，驟眼睇與日本國旗有幾分相似，雖然近日中日關係已經有所改善，但斷估中信電訊都唔會友善到咁，絲絲馬上與公司公關聯絡，經過指點，絲絲透過電腦將公司標誌放大、放大、再放大，終於發覺個標誌唔係得粒紅色小圓點咁簡單，而係由中信嘅英文名「citic」五個英文字母砌成一個圓形標誌，真係開咗個玩笑，絲絲自問未有老花，但睇嚟第日都要換番個高清顯示屏，或者買個放大鏡睇公告先得。
余絲韻