絲絲講場：內地中產人多勢眾
內地富豪數目雖然愈嚟愈多，不過要有穩定嘅經濟增長，一定要靠中產，因為只要佢哋有穩定消費，內需就有保證，唔使咁依靠出口支撐經濟增長。以大陸嘅標準，有乜嘢Quali先至係中產？當中數量有幾多？
今年中產人口逾3億
根據《福布斯》中文專欄作家話，內地中產嘅標準係生活喺城市、年齡25歲至45歲之間、擁有大學學位、年收入1萬至6萬美元……佢話今年內地嘅中產階層會超過3億人，咁咪仲多過美國嘅人口？
差啲講漏咗，據《福布斯》呢個專欄所講，內地嘅中產應該包括「各行各業」嘅專業人士及企業家，即係藍領都可以係中產。呢個標準比起內地學者以職業及學歷嚟分，範圍闊好多。
有個學者就話，北京的士司機收入雖然比佢高，但司機只係工人，佢就係教授，所以自己先係中產。講真吖，就算睇職業、睇學歷，如果個學者係窮教授，咁又點做中產呢？
捨得自由消費才匹配
經濟學家對中產階級嘅定義，到依家仲未有定論，但好多研究機構及學者就會度套標準出嚟，計吓社會有幾多中產人口。雖然每個國家嘅生活成本唔同，但呢個專欄有一點就好有道理嘅，就係攞得出三分之一收入用嚟自由消費及支配，就算得上係中產嘞。
余絲韻