期指觀瀾：先行離場等待結算
外圍氣氛改善，可惜港股連續兩日表現依然不濟，尋日恒指升30點報23,054點，與午市高位23,283點比較，回落229點之多，成交縮到744億元，也是接近兩個月最低紀錄。
有趣的是，港股似乎處於「獨弱」情況，隔晚美股因為消費信心指數勝預期，回升150點。而近兩日滬綜指亦明顯覓得支持，尋日指數以接近全日高位收，升38點，報2,898點，重返10日平均線2,895點樓上。中港兩地股市表現，形成巨大落差，明顯可見基金入市興趣唔大。
仲有兩個交易日結算，會唔會有奇迹打救好友？筆者唔排除超賣下有死貓彈的可能，但即月期指目標可能止於23,300點，最叻係23,450點，即使企穩，期指一日唔升穿23,850點，筆者唔敢輕易斷定扭轉弱勢，逆市揸好倉的張數也得小心控制。
一連兩日令人失望的反彈，令筆者對恒指要試22,680點大支持位的憂慮增加不少，惟A股及美股有短期完成尋底的形態，是目下博反彈矛盾之處。既然「賭場」日日都開，筆者在結算前兩日，唔會勉強開倉揀一邊落注。
John Mullen