市場熱線：波司登有炒作條件

本地魚缸成為全球股市最弱雞，唔知有乜原因，但好多股揀唔落手，本地地主股畀政府一棍打死，本地錢莊股按揭生意被拖累，內地錢莊股驚收水，資源股驚調控，結果炒來炒去又係零售股同車股；另外有隻特別醒神嘅係利豐（00494），花旗嘅新申領失業金同消費信心指數兩個數據都好靚；但人做零售佢做零售，思捷（00330）就繼續摸底。

房產稅係最後殺着

祖國魚缸持續反彈，滬綜指2,900點關口唔算阻力，但一到周末就驚加息，尋日A股主要係內房股帶起，古勝尋日話祖國樓市有啲蠢蠢欲動，「年尾跌兩成」似係話緊香港多過似內地，連溫總都承認樓價好難㩒得落，但中央立即又放風推房產稅。

古勝一直認為房產稅係最後殺着，論殺傷力肯定遠遠唔及香港嘅加料印花稅，但卻係劫富濟貧嘅其中一招。

中港內房股尋日好似擺明唔怕房產稅，如果呢招都出埋更無後顧之憂，事實上，呢排成功投地嘅五礦建設（00230）同佳兆業（01638）隨後股價表現都唔差，中央「鬥地主」接近一年，結果得個吉，炒家將來嘅信心會更強。

零售股呈個別發展

講到零售股就好分歧，尋日孖屐突然鍾意買錶，亨得利（03389）、英皇鐘錶（00887）、先施錶行（00444）同寶光（00084）唔理大細一律掃起，但賣衫嘅包浩斯（00483）同威高（01173）則回吐，體育用品股繼續被質低，可以暫時放埋一邊。

在下暫時睇唔通嘅係賣鞋股，兩大代表百麗（01880）同達芙妮（00210）呢排冇乜升跌，但女士冇理由淨買衫唔買鞋，而鞋股嘅好處係唔使受棉花價大升所影響。

做零售講潮流，買零售股亦係睇時機，最特別嘅一隻係波司登（03998），○七年十月到依家好「大鑊」——公仔圖似足一個大圓鑊，一上市即跌，跌到○九年三月得3毫幾子，然後開始翻生，孖屐對間公司做男裝非常接受，結果上月衝破4蚊創下上市新高。

一隻股創完新高兼碰到大市調整，跟住回吐係好正常，但該股跌到3.4元就跌唔落，尋日仲回升到3.77元，破埋短期下降軌。

份成績表應該唔差

近期派成績表嘅零售股，好多人鍾意炒番轉，波司登下禮拜一就公布中期業績，四至九月唔係買羽絨旺季，但可以睇到男裝分數合唔合格。波司登啱啱宣布做埋女裝，做生意通常贏就谷、輸就縮，男裝訂貨會一直增長唔錯，斷估唔會令大家失望。

另外，波司登就快成為摩指新貴（下周二收市後生效），今年冬天又話「千年一凍」，在下唔係天文台唔識預卜天氣，但波司登肯定係最佳寒冬概念股。

戰報

堡獅龍（00592）+11%

高仁上周五建議伺機吸納堡獅龍，當日低位0.76元，昨日一度升上0.85元，累積升幅11.8%。

浙江世寶（08331）+11%

桃桃上周三指浙江世寶估值偏低，當日低位3.7元，昨日股價高見4.13元，累積升幅11.6%。

古勝