臨近年尾，間間大行都陸續出研究報告講吓明年恒指高位係幾多點，點知有「港版末日博士」之稱嘅交通銀行香港首席經濟及策略師羅家聰竟然話：「今年唔做明年恒指預測喇，皆因去年測得唔係太準。」面對咁「謙虛」嘅答案，絲絲真係唔知佢講真定講笑，所以決定施展「打爛沙盆問到篤」嘅招數。
羅家聰話：「皆因現時股市脫離基本因素太多喇，所以連估都估唔到。」嘩！連「港版末日博士」都唔敢隨便估市，搞到絲絲對港股有啲擔心喎。
回頭諗真啲，早排美國第二輪量化寬鬆（QE2）推出，恒指就升到接近25,000點關口；早兩日朝鮮無端端向南韓發射200粒炮彈，於是恒指就急插600幾點。港股成日要面對咁多突發事件，明年恒指係咪夠力真係未知之數。所以都係羅家聰夠醒目，採取「少測少錯，唔測唔錯」嘅策略，令絲絲不得不寫個「服」字送畀佢。
余絲韻