大家平時有冇儲人民幣呢？絲絲聽到單有趣故事，話說工行（01398）係今屆廣州亞運嘅合作銀行，前幾日有個印度記者去到工行嘅新聞中心，問可唔可以代為收集5套人民幣硬幣，等佢帶返家鄉送畀仔女。
工行見佢咁有心思，於是拍心口話兩日內會收集齊全。但唔講唔知，原來細面額嘅硬幣已經好少流通，工行搵勻成個網點都係得1分及5分硬幣，尚差個2分硬幣；為咗唔好令呢位記者爸爸失望，工行職員喺屋企翻箱倒籠，仲問埋當地鐵路公司及小商舖，終於儲齊5套硬幣。
呢位廿四孝記者爸爸見工行服務咁周到，當然滿心歡喜啦，仲猛講「Dhanyavaad」。呢句話點解？即係印度話嘅「多謝」囉！所以計絲絲話，大家喺儲「人仔」博升值之餘，不妨儲番套「人仔」硬幣，可能將來好矜貴㗎！
余絲韻