人稱「彤叔」嘅鄭裕彤係開心果一名，而且有問必答，受歡迎程度可想而知，佢尋日出席新世界發展（00017）股東會，個個都想哄埋去，想問佢點睇股市、樓市、新股、爭產新聞……總之就有好多嘢問。
大家都預咗會有混亂場面出現，股東會一完，乖孫鄭志剛（Adrain）率先離開會場，隨後就到「純官」鄭家純出嚟，大批記者見到佢當然唔放過，一窩蜂追上前訪問，喺呢個時候「彤叔」先至慢慢行出嚟。
呢個咁奇怪嘅「前後腳」，睇嚟似乎係為咗「彤叔」可以舒舒服服咁離開會場而刻意作出嘅安排。不過記者一見「彤叔」就馬上擁上前，年屆85歲嘅「彤叔」亦有問必答，但當記者問到對南豐集團傳出爭產風波睇法嘅時候，佢即刻好精靈咁話：「呢啲人哋嘅嘢我唔知呀！」再問佢怕唔怕好似身邊嘅朋友有呢啲問題，佢就冇再答喇！
其實早前「純官」亦都提過，依家新世界系嘅分工都算係分得清清楚楚，「彤叔」每個孫仔孫女都有佢哋負責嘅業務，加上今日兒孫先行為「彤叔」開路，大家都知道答案啦！
余絲韻