絲絲講場:中金賀壽財氣盛

內地投行「一哥」中金已成立咗15年,尋日喺香港舉行酒會,唔單只汪建熙、哈繼銘呢啲中金舊人一早到場祝賀,仲有港交所(00388)主席夏佳理、金管局前總裁任志剛等本港金融圈猛人捧場,唔怪得身為主人家嘅總裁朱雲來成晚都笑容滿面,心情勁靚。

十五周年咁大件事,梗係要玩大佢啦,除咗香港之外,佢哋仲喺北京、上海及紐約搞咗連串活動,朱雲來及董事長李劍閣忙到馬不停蹄,而今次喺香港嘅酒會,更加係星光熠熠,中投國際(香港)公司董事長劉遵義、任志剛、夏佳理、永隆銀行行政總裁朱琦、財經事務及庫務局前局長馬時亨、新世界發展(00017)執行董事鄭志剛等亦有到賀。

穩當內地投行一哥

雖然中金呢兩年喺紐約、倫敦及新加坡都開咗Office,不過香港始終係中金發揮融資橋樑作用嘅重要基石。朱雲來成晚忙到氹氹轉,雖然冇時間停低同大家講吓未來嘅發展大計,不過絲絲由佢嘅笑容都感受到喜悅嘅心情。

中金喺呢15年做過唔少「大刁」,喺A股及中資企業海外IPO中,中金嘅總承銷金額分別達6,460億元及924億元,遙遙領先其他境內外嘅投行,而且喺前十大A股IPO及前十大中資公司海外IPO中,中金分別主承銷咗9家,「一哥」地位穩如泰山。

余絲韻

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率