期指觀瀾：反彈力弱小注試沽
港股尋日見死貓彈，惟力度相當弱，恒指升127點，收市報23,023點，追番周二大跌627點嘅五分一損失，成交奀到得828億元。建行（00939）及中行（03988）兩隻供股權交易中的內銀股，反彈力度明顯較未上「威士」的工行（01398）弱，中移（00941）逆市倒跌，也限制了港股升幅。
尋日大市表現，只能用失望兩個字去形容，君可見，十一月期指尋日幾乎浸浸落，午市後連23,000點都守唔住，以大低水93點收市，下周一結算，目下成交額偏低，加上美元轉弱等條件下，好友要反攻，恐怕唔容易。筆者亦做定最壞打算，如果現貨跌穿22,800收市，八月底展開的升浪，可以確認告一段落。
之後，恒指下試22,680機會唔細，尋日筆者本來打算趁反彈，重返23,350樓上小注開淡倉，可惜早市最叻去到23,205點已行人止步，筆者唔打算阻止看官23,000樓上試沽，但基於先機已失，且距離期指首個目標22,680至22,750只得兩三百點利潤，值博率唔高，只適合大大聲細細注試一試。
John Mullen