市場熱線:福山能源有勢起動

兩韓開完火又暫時回歸平靜,主角之一嘅南韓,尋日股市亦僅微跌0.15%,好明顯香港魚缸前日跌過龍,所以尋日反彈都好應該,但朝早最多升270點之後就無以為繼,下晝3點半又再度跌穿23,000點,收報23,023點,升127點,反彈力度令人失望,期指更加低水93點,成交亦縮到823億元。

賣衫股不宜高追

本地地主股有反彈,但啱啱先開始過冬,斑點狗(00101)同信置(00083)抽水抽得快,其他地主股就蘇州過後冇艇搭。有消息話,祖國樓市又蠢蠢欲動,甚至有內地專家話樓價跟通脹同步溫和上升已經還得神落,不過內房股仍係未見起色。滬綜指尋日回升1.12%唔算多,但深成指升幅達2.86%,而且升跌股數比例達95:5。

賣衫股仲未炒完,尋日威高(01173)、慕詩(00130)同漢登(00448)繼續霸住升幅榜。○八、○九年經濟唔好,自然買少件衫,今年香港經濟復甦,又自然買多兩件補數,所以賣衫股今年成績表都好靚;依家通脹咁犀利照計仍旺賣衫股,但始終人工加幅追唔上通脹,呢類股炒到十幾倍PE,老古咁多年都未見過,未有貨嘅不宜高追。

祖國體育用品股呢兩年夠炒得高興,但近月全部仆直,尋日主要係中國動向(03818)累街坊,訂貨會得2.8%增長,間公司較特別嘅係賣衫多過賣鞋,扣除棉花價漲令衫價上升,其實喺量方面係倒退。其他同類股股價亦鬥差,李寧(02331)創五十二周新低,安踏(02020)較高位跌近30%。

體育用品股開到一條步行街3間同一牌子,互相頂爛市,完全係短視行為。反而淨做零售嘅寶勝(03813)多數賣外國牌子,股價跑贏成條街,可見國產牌子喺營銷策略上始終差幾班。

祖國尋日連商品期貨亦回升,發改委日日出稿話要調控物價,但愈講得多人哋愈覺得你冇料到。煤價對民生其實影響好大,發電、煉鋼、水泥全部用煤,今年冬天話係「千年一凍」,所以煤價更容易炒上。發改委到依家都係口頭叫煤企唔好亂加價,但市場供應緊張,煤價亦係易升難跌。

焦煤價格穩步升

咁多隻煤炭股當中,3隻國企當然較貴,細煤礦股唔知堅定流,而中價嘅福山能源(00639)估值較為抵買,風險又較低。其實佢市值接近300億元,主要生產煉鋼嘅焦煤,公司早前公布第三季原焦煤同精焦煤產量分別按年上升17%及77%,而兩種煤的售價就分別按年升27.5%及10.9%。福山預期由於山西同河北等主要產煤區實施煤礦資源整合,加上今季為鋼鐵業傳統旺季,焦煤價格將保持平穩向上。

福山月初升到上接近6蚊,但回軟到5蚊附近又見支持,煤股逢親冬天都係旺季,最啱買佢嚟度過寒冬。

戰報

勵晶太平洋(00575)+23.7%

高仁尋日推介的勵晶,午後突然發力,最後高收於0.365元,以低位0.295元計,單日升23.7%。

德普科技(03823)+12.4%

桃桃周一指德普科技升勢有餘未盡,昨日創3.08元新高,以推介當日低位2.74元計,升12.4%。

古勝

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率