競爭激烈，內地各大體育用品商各出奇謀爭生意，中國動向（03818）就開創先河，請咗一名外籍女性擔任CEO，佢係Adidas前大中華區CEO，而原任中國動向CEO嘅秦大中就調任副主席。
呢位新CEO名為Sandrine,Suzanne, Eleonore, Agar Zerbib，將於下周一上任，喺九十年代，佢係Adidas中國區董事總經理，有份幫手打入中國市場，○八年佢升為大中華區總裁，得意之作係Adidas成為北京奧運會嘅贊助商。絲絲見到佢個英文名咁長，好想知道佢嚟自邊個國家，但公告就冇提到佢嘅國籍。根據合同，Zerbib年薪300萬元人民幣、董事袍金每年17.6萬元人民幣。
至於原來嘅CEO秦大中就調任副主席，當年佢與主席陳義紅由李寧（02331）走出嚟開創呢間公司，一齊打江山，以前佢哋提過，陳總負責策劃，秦總就負責執行。絲絲聽財經界朋友話，外界對新CEO反應一般，認為新CEO未必了解內地體育行業，特別係二、三線城市，不過公司引入新血，應有助新思維改善營銷政策。
余絲韻