南北韓突然開火，港股即時應聲下挫六百幾點，唔少中環人亦被殺個措手不及，好似渣打股票衍生及中介銷售部認股證銷售董事翁世權，咁啱明日（本周四）要去南韓出席當地窩輪市場研討會，真係中六合彩都冇咁準。局勢係有啲緊張，但佢都冇有怕，如期出發到南韓。
翁世權話公司喺南韓有窩輪業務，今次佢係去出席研討會做演講嘉賓，分享香港喺窩輪方面嘅經驗。香港喺窩輪及牛熊證成交方面係全球一哥，絲絲心諗南韓要「偷師」好正常啫。不過南韓近年其實已追得香港好貼，翁世權話當地窩輪成交量就嚟超過香港，但散戶滲透率就仲差好遠，參與窩輪市場嘅主要係專業人士。
講番日前港交所扑錘延長港股交易時間，並將午休改為12點至1點半，佢就預計將來喺1點半至2點會多咗人炒股，因為嗰時仲係好多上班族嘅食飯時間，佢哋可以喺Office買賣股票。
至於二○一二年嘅午休再縮至一小時，佢就話的確係趕啲，將來肯定多咗人食飯盒、便當等。各位有生意腦筋嘅人，不妨諗諗呢盤生意！
余絲韻