人人話中環有好多武林高手，原來美聯（01200）高級執行董事黃錦康（Albert）係太極嘅內家高手，佢曾經喺街上畀南亞大隻佬撞，撞人者反被震開！Albert仲喺公司內教授太極，等員工強身健體，仲將太極精粹應用喺管理工作上，你哋話幾厲害呢！絲絲獲授當中心法，偷偷哋傳畀大家喇。
Albert係畀太極特有嘅「最小力量，發揮最大力量、以柔克剛」哲學深深吸引，佢亦慶幸自己搵到個真正高手拜師，15年前開始學「趙堡太極拳」，一切由最基本嘅「單鞭」開始，簡單而言，「單鞭」就係太極一張一弛嘅精粹，可領悟到「丹田運轉」，等於練好身體內副引擎，然後融匯每個太極招式。
「單鞭」演練係「右拿左發」，即係全身放鬆、下盤邊鬆邊緊、左手開掌、右手勾，單係呢個架式，Albert就企咗一年，加上佢骨骼精奇又有悟性，修煉到今日，已做到全身氣聚丹田，發勁時將氣不斷運轉到指定位置，毋須大開大合，卸力同時攻擊。
其實呢個原理就喺太極標誌入面，先喺單田彷彿形生置中球體，一鬆一緊形成輪軸，驅動微轉而生力，發勁時球體內轉而不用力，盆骨兩側肌肉收放順圈而動，節節相連、一圈套一圈咁將勁力傳到指定位置，佢話最高境界可以將勁力傳到指尖，融於一點威力驚人。
Albert仲將太極心法運用於商業管理戰陣，強調「不刁不頂」，即係做生意或投資都唔好逆勢抗衡，要順勢而行就可以成功。
余絲韻