市場熱線：燃氣股防守力強

淡友仍未收夠籌

其實好多股友已預咗有「終極一跌」，跌穿23,000點係「最低消費」，老古上禮拜三、四都有提醒大家。恒指已經完成「初步目標」，但呢兩次先扮勁再逆轉跌得咁陰濕，恐防淡友仍未收夠籌；公仔圖暫時無險可守，較明顯支持係22,000點，如果由高位調整一半同保力加通道底部睇則係22,730點。不過，睇公仔圖係言人人殊，對後市有信心嘅，最好分段吸納。

尋日上晝已跌429點，下晝仲要加埋南北韓開火踩多腳，當時南韓魚缸已經收檔，沽盤湧晒嚟香港，而星洲魚缸亦跌1.87%，反而祖國魚缸聽到開火卻先跌後回穩，滬綜指同深成指均跌唔夠2%，實在非常理可預測。

北韓挑釁可能又係想搵着數，目前唯一可以做和事老嘅自然係我哋祖國，又係發揮國際影響力嘅時候。

呢排亞洲充滿火藥味，中日為咗釣魚島，官民暗地開火；台灣為咗個亞運跆拳道金牌，加埋藍綠爭五都選舉，視南韓為眼中釘；北韓有太子上台，開始又搞搞震。中日或南北韓如果擦槍走火就大件事，但亦毋須杞人憂天。美元柳暗花明又一村，QE2之後逢凶化吉，再成為避險貨幣。

老古尋日食完飯睇住A股同股指期貨大上大落，港股如果照跟會跟到氣咳；到出年三月港股會一步不離A股，到時更加要打醒十二分精神，但老古好唔贊成一二年再將下晝開波時間提前到一點鐘，做多半個鐘生意，但搞到食飯趕喉趕命唔知為乜。

內銀威士炒得過

尋日藍籌、紅籌、國企成分股「滿江紅」冇隻升，兩大錢莊供股「威士」大平賣絕對好炒，甩唔到身亦大可以供埋股（投機變投資），事關建行（00939）同中行（03988）計PE同PB都夠平。

祖國每日都有調控物價措施公布，「密集拳」呢招其實幾有用，至少薑價已大跌，商品市場連日重挫，政策收效就可免用更辣招數，CPI成為好淡友決勝之地。

每股遇到大跌市，股評人最鍾意搬出「炒股唔炒市」呢句說話，皆因就算大跌市，亦肯定會有唔少逆市奇葩，新奧能源（02688）係其中一隻，查實已強勢咗幾耐；煤氣（00003）早排增持港華燃氣（01083），顯示燃氣股長線依然有吸引力，短線已經打完讓賽，尤其中國燃氣（00384）已回到4.19元，屬於進可攻、退可守之選。

戰報

廣州藥業（00874）+30%

帥哥本月十一日推介廣藥，當日低位8.85元，昨日逆市創11.58元一年新高，累升已逾三成。

威高國際（01173）+18%

雖然尋日大跌市，但威高曾高見0.46元，較古晨本月十一日推介時低位0.39元，累升近18%。

古勝