昨日一早起身，見到歐盟又出手救兄弟，講真，一早已經係意料之內。筆者成日講，歐盟成立超過十年，咁辛苦將咁多兄弟一體化同歸一化，唔可以話分手就分手。
上星期講過「蜈蚣彈」，有Fans跟我講留意建行（00939），可惜擺位太低，未能入市，賺少咗，我覺得每個經驗係累積嘅，不論係炒股或者係投資者，都係咁講，最緊要係知自己做緊乜，慢慢了解隻股票嘅行為同佢嘅形態，你都可以將佢嘅節奏好好掌握，一齊練習。
筆者提過嘅I.T（00999），喺高位回落，其後在6.1元有支持。若企穩7元，將向之前高位進發，不過I.T波動性之高，非筆墨可以形容，心理質素一定要好強，好好訓練自己成為「股市毅行者」啦！
市回調，筆者覺得應該好好重新審視自己嘅投資觀念，一部分擺喺他日令指數飛升嘅成分股，例如內銀股，一部分就放喺動力股（或者叫價值股，又或者叫炒股，任得你講），不過控制注碼，要小心。
筆者曾講過「炒股唔炒市」，皆因用一年數據嚟睇，一○年恒指大半年以「向上走，向下走」為主題，然後九月一支箭咁「飆」上，但又有好多「好股」，講回報，已經跑贏恒指，原因係「大概念、大世界」嘅前提發揮強烈作用，記住概念期期轉，多留意市場資訊，做個精明投資者。
香港大學電子金融服務榮譽助理教授 徐燦傑