絲絲講場：4.7億購君樂寶 蒙牛擴酸奶版圖
內地好興透過合併及整合，達到汰弱留強嘅效果，好似蒙牛（02319）就剛啱買咗內地第四大酸奶品牌君樂寶。呢單收購都傳咗一排，終於喺尋日簽約落實，蒙牛用咗約4.7億元人民幣買咗君樂寶51%股份做話事人，喺交易後，蒙牛嘅酸奶市佔率會提升至超過30%！
獨立運作達致雙贏
睇番君樂寶嘅背景，原來佢哋之前有三分之一股權屬於三鹿集團，三聚氰胺事件爆發後，君樂寶即刻與三鹿劃清界線，專注做番自己品牌嘅酸奶，所以酸奶銷售都唔差㗎！喺酸奶行業中，君樂寶係河北第一，喺全國都排第四，而喺液態奶領域，君樂寶亦位列全國十強，佢哋喺華北仲擁有最大嘅酸奶生產基地。
大家都知依家內地人賺錢多咗，消費自然亦同步上升，酸奶市場增長嘅空間仲有好多，蒙牛就係睇中君樂寶喺華北地區嘅影響力及渠道，藉此開拓華北市場。喺完成收購後，君樂寶嘅管理層將維持不變，亦會以獨立品牌繼續運作，管理層話希望最終能達致雙贏局面。
余絲韻