絲絲講場：獲傑出董事獎 周光暉實至名歸
香港董事學會尋日公布本年度傑出董事獎，今屆有唔少知名人士得獎，合和實業（00054）執行董事胡文新及置富產業信託（00778）非執行董事趙國雄等就喺非恒生指數成分股組別獲獎，至於恒生指數成分股組別得獎者就包括中遠太平洋（01199）獨立非執行董事周光暉等。
董事學會表揚舊將
周光暉攞傑出董事獎都算實至名歸，而且別具意義。何解？大家都知佢係香港會計師公會前會長，對企業管治一向好熟悉，更特別嘅係佢以前做過董事學會副主席，今次董事學會頒呢個獎畀佢，算係錦上添花。
董事學會已經第10年舉辦傑出董事獎選舉，尋日由該會主席黃天祐主持典禮，佢話獎項旨在表揚及推廣董事專業化嘅重要性。事實上，專業董事乃董事會得以有效運作嘅關鍵，本年度傑出董事獎選舉嘅主題係「強化企管，提升業績」。傑出董事獎籌委會主席張永銳就話，要喺芸芸優秀公司中挑選得獎者係好難嘅事喎。
余絲韻