市場熱線：中化肥反覆創新高

對於炒樓資金會唔會轉行炒股嘅問題，好似講得通又好似講唔通。施政報告話投資移民唔計買樓，當日下晝港股成交同市值即急升，祖國上個月出新招打擊炒樓，A股當時亦係威係勢，但衝刺一輪之後又冇力。

大戶又執導齣好戲

根據過往經驗，股樓較似孖生兄弟，股樓齊升多過各行各路。睇尋日港股成交得796億元，好明顯大家都睇定啲先，加上冇乜波幅，連窩輪炒家亦縮沙。

究竟樓市炒家同用家比例係幾多，只能靠估，但古勝相信一定唔會少，仲有好多介乎投資同投機之間，價好就投機，價唔好就投資；即使係真正用家，見個市咁嘅款，都會博樓價再跌。依家嘅「勇者」剩得祖國大款，但班地主一向多計，睇吓呢次點化解嘞！

愛爾蘭欲拒還迎，卒之咪喺壓力之下提出援助要求，圓滿結果係歐元回升，美匯指數落到78邊，歐股美期全線上升。呢場戲早已預知結果，但仍係依足劇本做落去，大戶係導演，第3、4集主角會換做葡萄牙同西班牙，一有預兆就要先沽貨、再部署低位買貨。

尋日轉炒二至五線股，幾隻本地零售股又創新高；國務院出16招穩定物價，內容冇乜新意，但農業股同相關股全面反彈，主要係前排大家反應過敏，其實對上游股冇蝕底，中央只係禁炒同向窮人提供收入補貼，冇咗批人炒蒜炒薑搞亂市其實係好消息。

種橙嘅亞果（00073）自從批股畀班芬佬之後已經脫胎換骨，一拖（00038）重上8蚊樓上，幾隻肥料股：中化肥（00297）、中海化學（03983）、玖源（00827）同浩倫（01073）齊齊發力，其實中央上個禮拜已話要確保化肥供應穩定，又向行業提供用電同天然氣各種優惠，鼓勵玉米蔬菜棉花增產等於提高肥料需求，尋日已算升得遲。

鉀肥價格易升難跌

咁多隻肥料股，古勝對中化肥較為鍾意，有留意新聞都會知道，必和必拓想收購鉀肥商POTASH單嘢卒之喎咗，對中化肥係好消息，因為POTASH係公司第二大股東兼供應商，如果畀必和必拓壟斷就冇晒話事權。

至於加拿大點解否決收購，據稱因為認為鉀肥係戰略性資源——農產品嘅「威而鋼」，全球糧食供應日趨緊張，鉀肥關係國家糧食安全，未來值錢程度未必低過石油金屬稀土。中化肥股價一向同鉀肥價格同步，如果認同鉀肥係寶，買呢隻股就等同買農產品股，4蚊已經打好底，有機會反覆創新高。

戰報

東岳集團（00189）+10%

古晨昨推介東岳，早段低見3.5元，但午後買盤強勁，創一年新高，以低位計單日升逾一成。

六福集團（00590）+25%

小尾上周三指六福估值仍吸引，當日低位21.8元，昨股價創27.3元新高，累升25%。

古勝